2008 jyly Qor ǵylym, mádenıet jáne óner salasynda óz Syıaqysyn taǵaıyndady. Bul is-shara jas talantty qazaqstandyqtardy qoldaý jáne olardyń qyzmetin taný úshin beriletin Qordyń eń qurmetti marapattarynyń biri bolyp tabylady.
Syıaqy baıqaý negizinde mýzyka, teatr jáne sáýlet óneri, horeografııa, kınematografııa, kórkem ádebıet, jýrnalıstıka, fızıka, matematıka, ınjenerlik, qoǵamdyq jáne gýmanıtarlyq ǵylymdar nomınasııalary boıynsha aıryqsha shyǵarmashylyq jobalaryna jáne zamanýı ǵylymı zertteýlerge beriledi.
Qor Syıaqysy tanymal qaıratkerler úshin joǵary mártebeni taǵy bir dáleldeý bolsa, debıýtanttar úshin – ózin Qazaqstanǵa kórsetýdiń tamasha múmkindigi bolyp tabylady.
2017 jyldyń qorytyndysy boıynsha Baıqaý komıssııasyna mádenıet jáne óner baǵyttary boıynsha 57 tapsyrys kelse, ǵylym jáne tehnıka baǵyttary boıynsha 59 tapsyrys kelip tústi. Qor tóńireginde jumys isteıtin Jas ǵalymdar keńesi jáne Shyǵarmashyl jastar keńesiniń múshelerinen turatyn Baıqaý komıssııasynyń sheshimi boıynsha 12 nomınasııa boıynsha 21 adam Laýreat atandy.
Marapattaýdyń saltanatty rásiminde árbir Laýreatqa dıplom, keýde belgisi jáne aqshalaı syıaqy tabystaldy.
Jańa Laýreattardy quttyqtaı otyryp QR Tuńǵysh Prezıdenti – Elbasy qorynyń atqarýshy dırektory Qanat Jumabaev bylaı dep atap ótti: «Búgin biz óziniń daryny, eńbekqorlyǵy, óz isine degen adaldyǵy arqasynda jeńisterge jetken jańa urpaq kóshbasshylaryn – bizdiń Laýreattarymyzdy qoshemetteý úshin jınaldyq».
QR Aqparat jáne kommýnıkasııalar mınıstri - Dáýren Abaev, QR Parlamenti Májilisi tóraǵasynyń orynbasary - Vladımır Bojko, QR Parlamenti Senatynyń depýtaty – Byrǵanym Aıtımova, Qazaqstannyń isker áıelder qaýymdastyǵynyń Prezıdenti - Raýshan Sársembaeva, kompozıtor – Tólegen Muhamedjanov jáne basqa da belgili memleket jáne qoǵam qaıratkerleri is-sharanyń qurmetti qonaqtary boldy.
Qor Syılyqaqysynyń berile bastaǵan ýaqytynan bastap 200-den asa ǵylym jáne mádenıet ókilderi Qordyń Laýreattary atandy. Olardyń ishinde qazir álemge tanymal ánshi - Dımash Qudaıbergen, bedeldi halyqaralyq konkýrstardyń Laýreaty, opera ánshisi – Súndet Baıǵojın, tanymal balet ártisi – Dosjan Tabyldy, tanymal aqyn – Qalqaman Sarın, aktrısa – Ásel Saǵatova, estrada ánshisi - Alısher Karımov bar.
